Formulario digital disponibel pa re-aplicaccion pa permiso di taxi
Den colaboracion cu Bureau Interne Diensten (BID), ta anuncia e segundo y alabes ultimo oportunidad pa re-aplicaccion di peticion pa permiso di Taxi. E oportunidad aki a cuminsa 30 di september 2024 y lo termina 14 di october 2024.
E posibilidad aki ta aplica pa tur persona cu den pasado a entrega un peticion pa un permiso di taxi y cu no a haci uzo di e prome oportunidad pa re-aplicaccion via e portal di BID cu a tuma lugar entre november 2023 y februari 2024.
E formulario digital ta disponibel solamente pa persona cu a entrega un peticion pa permiso di taxi den pasado. Pa medio di e formulario digital, lo traha un lista di tur peticion pendiente a base di fecha cronologico.
Unabes cu cera e ultimo oportunidad pa re-aplicaccion lo cuminsa e proceso di inventarisa y pone tur peticion den secuencia a base di e fecha di e prome peticion (segun e documentonan cu a wordo entrega por medio di e portal digital).
E meta ta pa centralisa e peticionnan bou di Departamento di Transporte Publico (DTP) pa yuda trece mas structura y claridad den e proceso di peticion di permiso. E formulario aki lo ta disponibel riba https://www.bid.aw
Pa asistencia cu e formulario por tuma contacto cu oficina di BID pa traha un cita telefonicamente via tel: 583-4114 of via email na bid@aruba.gov.aw
